نئی دہلی: پرائیویٹ سیکٹر کی ٹیلی کام کمپنی بھارتی ایئرٹیل اس ماہ سے 5جی خدمات شروع کرنے جا رہی ہے۔ کمپنی نے مارچ 2024 تک ملک کے تمام شہروں اور بڑے دیہی علاقوں میں 5جی نیٹ ورک تک پہنچنے کا ہدف مقرر کیا ہے۔کمپنی کے منیجنگ ڈائریکٹر (ایم ڈی) اور چیف ایگزیکٹو آفیسر (سی ای او) گوپال وٹل نے منگل کو کہا کہ ہم اگست سے 5 جی خدمات شروع کرنے کا ارادہ رکھتے ہیں۔ اسے جلد ہی ملک بھر میں پہنچا دیا جائے گا۔ انہوں نے کہا کہ ہمیں یقین ہے کہ ہم مارچ 2024 تک ملک کے ہر شہر اور بڑے دیہی علاقوں میں 5جی سروس فراہم کرنا شروع کر دیں گے۔ تاہم انہوں نے کہا کہ ملک میں موبائل سروسز کی قیمت بہت کم ہے جس میں اضافہ کرنے کی ضرورت ہے۔
سی ای او وٹل نے کہا کہ ملک کے 5000 شہروں میں 5جی نیٹ ورک شروع کرنے کی تیاریاں تقریباً مکمل ہو چکی ہیں۔ وٹل نے کہا کہ یہ کمپنی کی تاریخ میں اب تک کا سب سے بڑا نفاذ ہوگا۔ حال ہی میں منعقدہ 5جی سپیکٹرم نیلامی میں ایئر ٹیل نے 3.5 جی ایچ زیڈ اور 26جی ایچ زیڈ بینڈز میں 19,867.8 ایم ایچ زیڈ فریکوئنسی حاصل کی ہے۔ کمپنی نے کم اور درمیانے بینڈ میں 5جی اسپیکٹرم کو کل 43,040 کروڑ روپے میں خریدا ہے۔
