ممبئی(ایچ ڈی نیوز)۔
محکمہ انکم ٹیکس (آئی ٹی) کی ٹیم نے ممبئی میں سماج وادی پارٹی کے ریاستی صدر ابو اعظمی کے دفتر سمیت ملک کے 20 سے زیادہ مقامات پر چھاپے مارے ہیں۔بتایا جا رہا ہے کہ یہ چھاپہ بے نامی جائیداد سے متعلق ہے۔ ممبئی ، وارانسی ، کانپور ، دہلی ، کولکاتہ اور لکھنو¿ سمیت دیگر مقامات پر آئی ٹی کے چھاپے مارے گئے ہیں۔ آئی ٹی ٹیم نے میڈیا کو ان چھاپوں کے بارے میں باضابطہ معلومات نہیں دی ہیں۔
ذرائع کے مطابق آئی ٹی ٹیم منگل کی صبح کولابہ میں واقع کمال مینشن نامی ابو عاصم اعظمی کی رہائش گاہ اور دفتر پہنچی۔ ابو عاصم اعظمی کی بزنس پارٹنر ابھا گپتا سے بھی آئی ٹی ٹیم نے تفتیش کی ہے۔ بتایا جا رہا ہے کہ آئی ٹی ٹیم نے آج وارانسی میں ونائک کنسٹریکشن لمیٹڈ کمپنی اور دیگر مقامات پر چھاپے مارے۔ ابھا گپتا نے ابو عاصم اعظمی کی کئی کمپنیوں میں بھاری سرمایہ کاری کی ہے۔ آئی ٹی ٹیم نے ممبئی میں ابو عاصم اعظمی کے دفتر سے ڈیجیٹل ثبوت اور کاغذات برآمد کیے ہیں۔چھاپے کے وقت ابو عاصم اعظمی ضلع اکولا کے دورے پر تھے۔ انہوں نے میڈیا کو بتایا کہ انہیں چھاپے کا علم نہیں تھا۔ تاہم، انہوں نے اکولا ضلع کا اپنا پہلے سے طے شدہ دورہ منسوخ کر دیا اور ممبئی روانہ ہو گئے۔
